冬日皮膚護理

冬日皮膚護理三部曲

作者:Kathy廷廷媽媽

冬天為BB護膚方法好多,Kathy廷廷媽媽分享冬日皮膚護理三部曲,大家參考一下,希望BB皮膚都白雪雪!

冬日皮膚護理三部曲

第一步:用夠保濕嘅沖涼液, 避免水溫太高

雖然冬天同bb沖涼會好驚凍親bb,但係用太高溫嘅水沖涼沖太耐嘅話, 又會好容易令bb嘅皮膚越沖越乾,尤其是已經有濕疹嘅bb就更加要小心。水溫避免過35度, 快快手喺 5至8分鐘內沖完涼就最理想啦!
沖涼液方面我就會用Oilatum 或者 cetaphil, 佢哋都屬於比較保濕嘅沖涼液,自從廷廷心口位爆過濕疹之後我都係用呢兩隻沖涼液幫佢沖涼。

第二步:瘋狂保濕

保濕真係唔可以懶, 一懶就會出事! 廷廷都試過喺臉、頭頂、手摺位同心口位爆濕疹。臉上面同手摺位係靠一日搽4、5次 physiogel AI cream 好返。 其實保濕cream唔需要買得貴亦唔需要用得好刁鑽, 平價嘅豬油膏或者凡士林效果一樣好好, 亦都要睇夾唔夾bb皮膚。 反而好多媽媽推介嘅加州寶寶我就覺得效果一般, 大家不妨試下邊隻cream最夾自己bb皮膚。

最緊要就係沖完涼即刻全身搽保濕,朝早同埋臨瞓都搽一次, 千祈唔好等到塊面紅卜卜先至搽呀, 咁樣皮膚就已經係爆拆緊啦, 手腳嘅摺位好易爆裂,亦都要加重保濕。

塗cream3日後
塗cream 5 日後

第三步:著純棉底衫


冬天有時會著羊毛底衫保暖, 但係羊毛底衫物質地就可能會刺激到bb皮膚。 所以 著返一件純棉嘅底衫, 然之後先再著羊毛底衫就可以保護到bb嘅皮膚唔會受到刺激又保暖。

作者:Kathy廷廷媽媽

Leave a Comment