分享到:

上篇介紹完沖繩兒童王國公園入面嘅動物園區、機動遊戲區,今次同大家介紹返兒童王國公園入面唔可以錯過嘅館「神奇博物館 Wonder Museum」。佢係類似科學館嘅展館,另外要俾入場費先可以入去玩。但係價錢都超平,直情係好抵玩!! 我都估唔到咁好玩,仲要係大人細路都鍾意玩,我哋三個家庭喺入面足足玩咗兩個鐘有多。館入面總共有三層樓咁多,總之就超級多嘢玩啦!!

入場費
成人: ¥200 (約HKD14)
3歲或以上~高校生:¥100 (約HKD7)
3歲以下:免費

小朋友都即刻變歌王,呢支咪配上旁邊有個掣,係可以變聲嘅。會變咗把咩聲,就真係要玩過先至知啦~

用日文片假名,再加啲力,不停咁拉實按落去,就會發出呢個片假名嘅發音,真係好搞笑。有齊晒日文片假名第一組片假名嘅發音 ア(A)、イ(I)、ウ(U)、エ(E)、オ(O)。

其實主要係靠傳送空氣入去,令到佢發出聲響。但點樣做到個個唔同聲,呢個真係好神奇嘅地方!!!

擺隻手指上去就會測試到你嘅心跳~~卜、卜、卜…

呢兩個小朋友睇梗咩睇得咁專心呢??

原來只要拎住手上嘅特製鏡片再望去牆上面透明無名嘅圖畫,就會發現到好奇妙嘅事。

透明嘅地方,透過手上嘅鏡片出現咗唔同嘅顏色呀!!

一個方塊點樣先可以成功一氣呵成由左邊送到右邊呢??

巨大齒輪,仲可以拆出嚟自己組裝,重新組裝之後都一樣可以繼續一齊轉。

一條繩可以任由你去設定佢嘅轉速,點設定都得,可以好快速可以好慢速,快速可以快到無影但條繩都唔會斷。

入面啱晒親子嘅遊戲好多,大部份都係以科學、物理原理為主嘅遊戲,一齊長知識。

兒童遊戲區,砌積木可以讓小朋友發揮創意。

呢個遊戲係利用雙手,雙手要同步進行拉開直至你認為呢個尺寸係1米為止。

好似去咗機舖嘅遊戲,眼前有一堆彩色嘅波波,首先按Start掣,屏幕就會同你講點樣玩,玩法係佢會顯示6隻色,俾你認住幾秒。

之後燈光就會變,你眼前嘅所有波都變到一樣色!! 呢個時候又係倒數時間,你要將電腦俾你嘅6隻色原原本本咁跟次序擺返好,執返齊。

不過…燈光之下全部都一樣色,真係好有難度呀!!! 玩左兩次都輸

超好玩嘅考反應遊戲,遊戲正式開始就會輪住著藍色燈,當你完成一盞燈,下一次盞就會唔知喺邊個位出現,所以挑戰者一定要好專心呀。

拍拍機遊戲系列~倒數10秒,電腦會先顯示幾秒等你預算,然後唔會出現提示,等你自己個心入面數,數到10就要拍下個掣啦~~

自然音樂系,原來人字拖加幾條水管都可以做到咁自然嘅音樂~

親子手作區,呢到參與手作價錢都好平。

同和牛B一齊整Tote Bag,¥300玩一次,一個大人可以陪一個小朋友(約HKD21)。大會會提供Tote Bag,印台、動物手印形印章、字模。

入面有三張台,每張台都有唔同色嘅印台(藍色、紅色、綠色)。當日人唔多,所以我哋張張台都有去坐過。

大會提供了六款動物手印,有獅子、猴子及鳥爪等。

我其實好鍾意、好享受同和牛B一齊做手工,雖然佢未掌握得好好,有時會愈幫愈忙,但係唔俾機會佢學,又點會有進步呢?

放手俾佢去試,要相信佢係做得到!

完成啦~~~

又嚟到好玩嘅遊戲區,每一處都有嘢玩,日本人真係好有心思呀。

呢邊牆係磁石物料,可以自由砌出軌道,放個波上去,佢就會跟住碌。

放電區運波波遊戲組,將波波放入去,再轉動軚盤直至到頂,個波就會喺上面碌過。呢三條柱都係類似玩法,終極都係要將個波送上去。

運送波波遊戲,可以訓練手、眼協調嘅遊戲。

介紹最後一層,有一種神秘嘅氣氛。

玩影子遊議,唔知而家仲有幾多人識用自己對手玩影子呢? 我就最記得點樣整兔仔同埋狼,唔識唔記得唔緊要,佢哋都有教大家玩影子~

集氣之後,雙手同步拍落去就會形成磨菇雲,如果唔能夠同步就做到普通嘅雲霧感~

又係發揮創意嘅時候啦,「七巧板」相信大家都玩過,呢一樣玩具,去到今時今日依然係有佢吸引之處。

呢個超好笑,又係超放電,只要企喺地上大大個黃色圓波波入面,不停郁動你嘅身體、四肢。屏幕上嘅卡通人物就會跟住你嘅動作去郁~真係好好笑呀!!!

如果在出風口上沒有任何遮擋,就會形成了龍捲風的霧氣,和牛B站在中間霧就開始消散了~~

幼兒專屬嘅遊戲區,有圖書、玩具等。

富有森林氣息嘅一個遊戲區,入面仲有好多唔同造型嘅服飾可以免費試穿同埋影相留念。

搞笑名畫展品區,你想唔想成為名畫嘅主角呢? 呢個機會揀直千載難逢呀,快啲集郵啦~

嚟到木製遊戲區,呢到又係超多嘢玩!! 大人細路都玩都唔捨得走呀!!

呢個四方形嘅遊戲組,上面嘅每一隻動物造型都係人手繪畫,超有心機,重點係點一行都有唔同嘅機關,只要將木珠放入路軌就會沿住路軌碌呀碌。

同樣都係木製嘅遊戲,無論你將木球放同一個位幾多次都好,每一次墜落嘅位置都會好大機會唔一樣,研究咗好耐我都研究唔到個原理,呢一點先係吸引我哋玩咗好耐嘅原因。

沖繩兒童王國公

地址:〒904-0021 沖縄県沖繩市胡屋 5-7-1
網址:http://www.kodomo.city.okinawa.okinawa.jp

Facebook:https://www.facebook.com/okinawakodomonokuni/

<行程 + 景點

【沖繩親子自駕遊】兒童王國公園 x 睇動物 x 玩機動遊戲 (Part I)
【沖繩親子自駕遊】海洋博公園 x 邊睇鯨鯊邊食晏 x 鯊魚館 Part III
【沖繩親子自駕遊】海洋博公園 x 海豚表演 x 好多海龜 x放電公園 (Part II)
【沖繩親子自駕遊】海洋博公園 x 美麗海水族館 x 好多魚&鯨鯊呀!! (Part I)
【沖繩親子自駕遊】親子齊玩 x 裝飾好味雪糕 x 少女味 @ Blue Seal x Ice Park
【沖繩親子自駕遊】TomiTon 醫肚+放電+購物 & 森林家族專門店

分享到:

Leave a Comment

Your email address will not be published. Required fields are marked *