分享到:

最近MegaBox新開咗一間壽司店「九井壽司」,以新幹線做主題。有好多款壽司、小食選擇,當中仲有兒童餐添呀!

 

有三兒童餐 – 太陽號 (牛肉薯餅、雜錦壽司、味付螺肉、益力多)、月亮號 (海苔魷魚天婦羅、加洲卷、玉子燒、益力多)、星星號 (蟹籽沙律、三文魚細卷、日式炸雞、益力多)。

壽司、炸物熱食Menu選擇超多。

仲有驚喜價推出嘅九井海膽三色迷你丼 $20。

門口影相呃Like位,模仿車廂座位設計。

入面嘅牆身都做到好似新幹線咁。

餐廳入面有多張bar台、卡位。

每個位都設有一部平板電腦,供落單時使用。語言仲有中、英、日文選擇。

 

而每次只可以Order 4樣嘢。

我哋點下點下,大概一家三口點咗十幾碟嘢,當中有4、5樣係小食。

食物方面

食物種類、選擇好多,不過唯一係無烏冬食。

賣相都唔錯㗎,以下係部分我哋點咗嘅食物。

蟹籽沙律 $22

芝士蟹籽軍鑑 $24、吞拿魚沙律軍鑑 $20

帝皇蟹棒壽司 $16

熟蝦壽司  $19

三文魚壽司 $18

龍蝦沙律卷 $25

吉列廣島蠔 $36

燒雞軟骨串  $28

每樣食物都係由眼前呢架新幹線送嚟,佢唔需要行路軌,拎完食物佢靠感應就會自動開走㗎啦,唔需要自己㩒掣退回新幹線。

價錢方面,貴元氣壽司少少,但有啲食物款式係元氣無,而佢係有嘅,而部份元氣係有嘅佢哋就冇。

設備方面

餐廳係無BB櫈提供,如果帶住較年幼嘅小朋友又想食嘅話,就要等卡位了。另外,餐廳只現金,唔知係咪暫時性呢。

和牛B好鍾意食壽司,迴轉同高速線我哋都成日會去,因為佢好鍾意個環境,佢好好奇,但又唔會手多多。不過佢年紀仲細,可以食嘅壽司其實好少。我哋通常嗌一碟壽司俾佢 (蟹柳卷/玉子卷/青瓜卷),再搭配一個烏冬就最飽肚。

九井壽司 @ MegaBox

地址:九龍灣MegaBox L9-25

電話:2761 9188

————————————————–
歡迎聯絡我&和牛B: chungying56@hotmail.com
Facebook專頁和牛B嘅成長專頁

分享到:

Leave a Comment

Your email address will not be published. Required fields are marked *