分享到:

1) 8月頭知道有左,但追溯返,其實 7月中已經懷孕。而我生日正正係 7月尾,所以出席左唔少飯局。當中,酒、魚生、生蠔呢D「我的最愛」真係少不了。發現Bingo左之後,驚到我鼻哥窿都冇肉。細妹見我咁驚,反而叫我唔使太早去產檢,因為BB無咁快有心跳,到時盞嚇親自己。我到8月21日(5週),第一次去私家產檢,成功見到BB心跳先定返D。

2) 由於一開始就亂食野,所以之後食咩都更加小心。基本上食D咩之前,都會上網Check下食唔食得!結果,愈Check愈擔心,因為真係咩都有人話唔食得。。。西瓜、綠豆、蝦、蟹呢D唔使講,原來連皮蛋、木瓜、香蕉、黑木耳、羊肉、香菜、荔枝、桂圓、杏仁、蘆薈、薏仁、山楂等等,都話唔食得。。。頭4個月已經冇咩胃口,仲乜都唔比食,係咪想迫死我。好在最後去左QE聽產前講座,姑娘表示真正要戒口既,其實只有未煮熟既食物(例如:魚生、沙律、軟雪糕)、煙、酒。其餘既,就算連咖啡,只要媽媽想食,係可以食少少既。

3) 記得岩岩有左,除左孕吐,基本上feel唔到BB既存在。又暈又嘔勁唔舒服,但至少我知BB係肚入面好健康。一到星期六日長攤係床,會嘔少啲,反而驚BB有咩事。呢個時候,就會迫老公聽下個肚,聽下有冇水聲。其實有水聲係咪代表BB係入面郁,我真係唔清楚,而老公都表示,D水聲好細聲好難聽得清楚。所以佢有時為左安撫下我,係扮聽到。。。

4) 到18周,第一次感受到弱弱既胎動,好感動。之但係,到胎動愈來愈明顯,有時直情會痛到嗌出聲。。。又會諗BB係咪係入面爭扎,係咪啲胎水有問題?定臍帶纏頸令BB抖唔到氣?當然,只係我諗多左,助產士話BB健康先會郁,唔會有“郁得太多”既問題。

5) 20週,去QE照結構。當日個姑娘好好,好細心。一邊照,一邊解釋,仲同我地一齊數埋手指腳指。一切正常後,姑娘表示,BB比正常大左一星期,叫我唔好食太多甜野,太大會難生。嘩,我想順產呀,唔好咁大呀。即刻Book埋私下檢查。醫生話BB大一星期好正常,同埋BB係個頭大,而頭大係遺傳多,唔太關食甜野事。(聽到頭大係遺傳,我老公即時望住我偷笑。。。阿姐我係面大,唔係頭大囉,望咩望,笑咩笑。)

6) 孕吐改善之後,基本上每星期都會重差唔多一磅。到30週,一上磅,竟然冇重,仲輕左兩磅。。。好驚好驚,明明咩都冇做過,點解會輕左。。。返工途中,好緊張咁通知細妹。細妹回覆:你係咪岩岩柯左C呀?一見到個短訊,即場爆喊,我已經好驚la,點解唔安慰下我,仲係到搞gag。細妹知我認真咁驚之後。。。

細妹問:咁BB今朝有冇郁?

我:有,不過我覺得佢冇平時咁活躍,係咪有事?

細妹:有郁就得,更何況你未食早餐。你買隻香蕉返公司食,食完甜野BB會郁得勁D。

照細妹既說話去做,BB真係好似郁返多D。個人定D後同細妹黎個「賽後檢討」,最後發覺原因係因為我第一胎,太得閒、太多時間亂諗。到生第二胎,又要照顧大寶,根本冇時間擔心無聊野。btw,原來我真係柯左C,所以輕左。。。

7) 2X週之後,每次產檢都會問醫生/助產士,BB宜家個頭落左去未?其實我覺得助產士真係好勁,佢地摸下就知BB個頭係邊。27週時,QE助產士話BB個頭係下面,但宜家距離生仲有段時間,所以BB係有機會調返個頭上去,今次唔可以作準。之後去私家再照,醫生好淡定咁話BB個頭係下面,臍帶纏頸一圈。下,臍帶纏頸!!!咁點算,佢郁得咁勁,一陣生個時纏頸三四圈都有可能喎。醫生繼續溫柔地解釋,臍帶纏頸好常見,而臍帶亦都好長,就算真係纏頸,都仲會有位比BB,唔一定會影響順產。

第一次做媽媽,緊張D真係無可厚非。自問的確成日諗多左,好在身邊有一班唔怕煩既親朋好友。有人傾訴真係好重要!

就算再白痴既問題,我細妹都會同我正面面對。由驗孕棒有兩條線開始,我每日都一定有D野煩下我細妹,好在宜家科技發達,有咩可以Line問,就算佢反我白眼,我都睇唔到。

頭三個月真係好難挨,最難係唔可以同人講,又係因為”驚”,所以跟足傳統唔同人講。真係一過三個月,就即刻約班好姊妹食飯報喜。印象最深刻既係,其中一個好朋友,一聽到竟然感動到眼濕濕。。。唔好咁la,我同我老公講個時佢都冇喊,你咁會令我覺得佢好冷血、好冇人性ga!

而最重要既,的確係每日係你身邊個個。我老公無論婚前婚後,都唔係一個細心體貼既人。但佢有2個優點:

1係就算有D野佢唔會主動做,但只要你開口,佢就會跟住做。例如,初初孕吐,每次廁所嘔完出黎都係見佢打緊機。。。忍唔住開口:可唔可以針杯暖水比我?之後佢每次聽到我係廁所嘔緊,都會針定杯暖水等我出黎。

2係佢會幫我應付99(大家真係唔好揀個太孝順既黎結婚呀XDDDD)。例如,岩岩有左,99提我唔好食綠豆,呢個時候,我偉大既老公就會上網,專搵D話綠豆對孕婦好既文章比99睇。而我亦好狗咁話:係Wor,不過都係聽99講唔好食咁多,少少應該得既。

個人感受:如果你身邊有正在大肚既媽媽,記得咩都要支持佢地呀。就算佢地要食西瓜,都唔好話: 「下,你大肚邊食得?忍下啦!」。要講:「食啦,食少少唔驚既。」因為媽媽一定係最擔心BB既人,就算你唔提佢,佢都只敢食少少,過下口癮。但懷孕已經好唔舒服,你再咩都同媽媽打對台既,只會影響媽媽心情,影響BB健康。快快樂樂咁懷孕,先會有開開心心既BB 架嘛。

分享到:

Leave a Comment

Your email address will not be published. Required fields are marked *