最近真係忙到一個點，屋企野總係好似做唔完咁。
前排天氣又潮濕攪到個人積埋晒啲濕氣，真係攰上加攰。
最慘豬係小JM突然呢幾晚半夜扭計，
有時仲要扭俾媽媽奶先攪得佢掂。
小JM扭計，變相我同小JM爸嘅睡眠質素都隨之而下降。
為咗令一家有覺好訓，小JM媽決定要煲返啲靚湯俾屋企人滋潤一下。
今次小JM媽揀咗煲【節瓜章魚眉豆湯】。
你以為節瓜好少嘢？咁你就錯啦。
呢一款湯水真係唔可以睇少，上至老人家下至小朋友及孕媽都啱飲架。
食材知多啲
節瓜：
係中醫角度屬於不寒不熱嘅食材，有生津止渴、驅暑及益胃健脾嘅作用，
而且對消除水腫亦有幫助。
章魚：
其實即係八爪魚乾
中醫認為章魚屬性平和、味甘帶鹹，
有養血通乳，及治療血虛經行不暢和產後缺乳嘅功效。
眉豆:
係含有豐富營養嘅豆類之一，而且功效都好多架。
能有助提高免疫能力，有助消化及防止便秘，
而且亦有健脾袪濕及增強造血嘅功效添。
節瓜章魚花生眉豆湯
材料：
節瓜 兩個
章魚乾 一隻
瘦肉 一塊
眉豆 適量
花生 適量
*可按個人喜好加入陳皮及蜜棗*
做法:
1.) 先將節瓜洗淨，再以小刀將皮刮去
並將每個節瓜切成八小塊，備用
2.) 可以清水輕輕沖洗章魚，再將章魚切成小塊，備用
3.) 將花生及眉豆以清水浸泡，備用
另外煲一鍋水，將瘦肉汆水備用
4.) 先預先將水煲滾，
再將所有材料一併放入，煲至大滾後轉中小火再煲一個鐘即可。
5.) 煲完啲湯都一樣咁清，唔會油膩
呢個湯小JM都好鍾意飲，而且仲會食埋啲節瓜添架。
♫ Mami Buy香港媽咪幫。駐站Blogger ★ 傑。斯與晴 ♬
♩ Ohpama。Oh爸媽。駐站Blogger ★ 傑。斯與晴 ♪
♩ Ubaby Magazine。駐站Blogger ★ 傑。斯與晴 ♪
♫ MyBB.com。 駐站Blogger ★ 傑。斯與晴 ♬
歡迎追蹤 小JM 既Fanspage 「傑。斯與晴」：
如有任何查詢/合作，歡迎聯絡我同小JM 參與產品試用或者各樣活動
媽咪既Email係： sleepyceci＠hotmail.com
小JM既Facebook Page： 傑。斯與晴（Jolie Babe。小JM の 成長印記）