分享到:

繼早前同柯豬一齊去錦田鄉村俱樂部參加學校旅行後,昨日又再次坐旅巴出發,參觀香港中央圖書館的玩具圖書館!


原來喺中央圖書館的二樓,有全港首間玩具圖書館,裡面的珍藏住超過1600份不同款式,適合0至8歲小朋友玩耍的玩具,男孩子鐘意的汽車類,工具類,board game, puzzles ;  女孩子愛玩的娃娃,煮飯仔等等,我估講得出嘅都會喺度揾到。小朋友可以閱覽玩具目錄冊揀選心水玩具,家長幫忙填寫玩具索取表格交俾職員就可以喺所屬時段內任意借玩。柯豬都借咗兩套煮飯仔煮餐豐富的午餐俾我食 😂 時段完結前會有音樂廣播提示,我地就一齊收拾再交還俾職員哥哥姐姐。


除了借玩具,場內設有4個主題遊戲區:嬰孩遊戲區、模仿及想像遊戲區、創意遊戲區及智慧遊戲區,配合不同年齡兒童的發展需要及遊戲模式。最受歡嘅我諗就係兩層高的遊戲屋,行上層高一高咁望落嚟揾爸爸媽媽又得,喺下層戴手套、拎工具扮裝修師傅亦得。柯豬用架泥頭手推車裝住啲生果,痴上牆又摘落嚟,好得意~!


以下是柯豬媽媽節錄咗部分玩具圖書館的資料,有興趣的爸爸媽媽記得要預約先好帶小朋友去玩呀!

★開放時間:
星期1,2,4,5,6,日 – 10am to 9pm
星期3 – 1pm to 9pm
公眾假期 – 10am to 7pm
(當中有啲時間會因為學校/團體參觀,會場清潔而暫停放開,爸媽要留意玩具圖書館的開放時間及使用時段:https://www.hkpl.gov.hk/tc/about-us/HKCL/services/toy.html )

★每位小朋友(8歲或以下) 可由1-2位成人陪同

★預約可經電話(Tel: 2921 0378) 或親身去預約,每人每日只可預約一個時段,每節45分鐘。

★如果無預約又到咗圖書館,可以試下親臨登記即日的waiting list, 或者如果咁啱該時段名額未滿(每節最多40人) ,都可能即刻有得入去玩㗎,先到先得。


參觀完玩具圖書館,爸爸媽媽可以同小朋友去外面借閱兒童圖書,讓佢地感染良好閱覽氣氛。柯豬媽平時都會盡量揾機會同柯豬睇圖書講故事,未生妹妹前我地每晚都會睇一本書,無論係長或短篇故事,中文或英文,都係非常好的親子活動。而家因為要湊兩件少咗好多閱讀的時間,所以能夠與柯豬一同參加學校活動變得更重要,希望可以彌補無法時常陪伴她的遺憾。

學校活動完結後,柯豬一家四口仲走咗坐叮叮。對我地新界人嚟講,真係好少有機會坐叮叮,可以俾柯豬試下搭電車都係一次不錯的經歷!(港島的爸媽會唔會都特登帶小朋友嚟新界西坐輕鐵?)

#柯豬媽媽 #柯豬姐與些莉妹
#香港中央圖書館 #玩具圖書館 #親子活動

分享到:

Leave a Comment

Your email address will not be published. Required fields are marked *

會員登入