分享到:

講起福岡既由布院又點少得「由布院市集」同「金麟湖」,

呢兩個都係必去既景點,而且足夠我地由朝早行到下晝既五點幾,
真係太令人樂而忘返!
唔講你可能唔知,由布院入面仲有一個小小既Village Garden,
入面仲有啲小動物添,小朋友見到應該會好開心!
接下落來都會為大家一一介紹!
大家要準備好Mark低要去既點地啦!
當日去由布院係由爸爸自駕遊既,
所以我地一大早起身梳洗好食飽飽早餐就出發攞車,
向我地既溫泉之旅地點 – 由布院 出發!
去到由布院其實只係十點零鐘,
未夠鐘Check-In,所以只係放低晒啲行裝係旅館,
我地就再出發去 -由布院市集!
傷心小插曲: 
不過就係出發之前媽媽就發現唔見左。結婚戒指。!!!!
媽媽簡直係覺得晴天霹靂!
明明漏左係酒店,但無奈酒店回覆話搵唔到,
所以媽媽一路都好失落,
同時亦為旅程添加左一點不完美。
(不過好好彩係返到香港仲買得返同一個款!)
好啦,衰野講完,都係講返啲開心野先,
我地繼續回味一下由布院市集!
你睇,就算係平日都一樣咁人山人海!
(當然,因為都會有旅行團架嘛!)

因為一大早就出車,所以唔係好食得夠,
所以一落車我地就要買。野。食!
當然小JM除外,因為小JM有好多食唔完既小食!
食飽係車訓到落車添!
有圖為證架!

爸爸泊緊車既同時,我地就帶小JM落車,
係停車場對面就見到有一檔串燒,係即燒架!
推薦度:

味道都唔錯,
我地食左雞肉,腸仔同雞皮!
出奇地雞皮一啲都唔漏,又唔算太油膩,係爽架!
真係值得再試!老闆仲好nice好好人添架!
(上圖個串就係雞皮,你又睇唔睇得出?
因為我地預計「市集」會有好多野食,
所以我地係打算留肚掃下街先,
到小JM要食Lunch先再搵位坐定定食正餐!
一路行,就俾我地發現左第一個可以影想既小鋪: 龍貓!

龍貓館唔算係好大,
但入面有著各式各樣既貨品,
仲有好多大大小小既龍貓系列擺設添!

離龍貓館無幾遠就有一間香氣撲鼻既店鋪  -由布院ミルヒ ホームページ(Milch)
地址:日本〒879-5102 湯布院町川上3015−1
電話: +81 977-28-2800
來到 Milch 就緊係要試下佢地得賞既半熟芝士蛋糕啦!
仲有冷熱兩款食法,一樣咁好味。
而我地今次就揀左熱食!小JM都有試食,仲要食唔停!
味道唔會太甜,軟綿綿,真係好吸引!
推薦度:

食完芝士蛋糕之後,我地見到另一檔小食,
主要售賣炸物,
我地今試左豐後牛肉餅同炸雞。
但係就有啲令人失望,
牛肉餅比起之前係上野食過既差好遠,
呢度既味道真係無咩,
而家有啲油;
雞都只係一般,炸完似係放左好耐,
所以炸皮同雞似都分散晒。
推薦度:

食完一輪小食後,我地就真係好認真咁搵餐廳食個午餐,
咁岩係由布院呢度有一間「Snoopy茶屋」,
於是我地就去乖乖地排隊等位。
見到Snoopy,小JM都會叫: 狗狗!
佢仲篤人地個鼻呀!哈哈!
推薦度:

Snoopy茶屋既店內、外設計都好吸引,
從店外看去,店既裝潢比較古色一啲,
店外右手邊會見到上圖個隻石像Snoopy(神像?)。
入到店內,係Waiting Area會有圖書可以俾等位既客人睇,
Waiting Area仲有幾幅好靚既Snoopy書添,
顏色仲好吸晴,好鮮豔!
而且仲會有隻大大既Snoopy陪你一齊等位添!
而係收銀櫃檯位置旁邊就有一個飾物櫃,
全部都係Snoopy既野來架!岩晒鐘意Snoopy既人!
同樣地,Snoopy茶都一樣有提供小朋友用餐椅同餐具。
但食物就只係屬於一般,
我地幾個大人都覺得只係普普通通,
唔算有太大驚喜。
食飽就係緊繼續行啦!
(係,無錯,仲有野行,所以你要繼續睇!)
食飽之後我地行左去由布院既 Yufuin Floral Village!
地址: 日本〒879-5102 Oita Prefecture, Yufu, 湯布院町川上1503−3
電話:+81 977-85-5132
推薦度:

Floral Village 內的設計以歐、美風為主,
令人彷如置身於「哈利波特」場景之內。
園內除左有各式各樣既特或商鋪以外,
仲有一個小小既動物園仔,
入面有松鼠、山羊、兔仔、鴨鴨等既小動物。
而最特別既係,園內設有「貓頭鷹館」,
可以俾客人入內參觀,
但貓頭鷹館係需要額外收費既,
不過因為小JM怕怕貓頭鷹,
所以我地無入內。
如果你需要入館睇貓頭鷹,
記得要保持安靜同唔好用閃光燈呀!
以免嚇親貓頭鷹們呀!

行完晒 Floral Village 之後,我地又繼續向「金麟湖」出發!
金鱗湖其實係一個水池來既,面積0.8公頃,週長400公尺。
由於湖面朝早會出現晨霧既關係,金麟湖就成為左由布院既景點之一啦!

好可惜我地去到已經係中午過後,所以就咩霧都見唔到。
不過個湖真係好靚。
咁岩係我地影相個陣仲有幾隻小鴨鴨游過來做「模特兒鴨仔」添!
因為天氣太好太舒服既關係,
小JM係去金麟湖既路上已經訓著左。
金麟湖旁邊其實原本係有一間神舍既,但隨住時間既變遷,
神舍已經唔係度,呢個位址只係掉空左係度。
但依舊一樣可以見到神舍惜日的痕跡。

回程路上我地依舊會買小食掃街,
亦有去超市買用品同零食。
經過呢間專賣芝士食品既店鋪又點可以放過呢?
我仲買左幾盒禮品做手信添!
真係幾好食架。
推薦度:

呢間玻璃工房真係好靚,可惜帶住小JM唔係好敢入內,
怕小JM一個唔該整爛野就敝敝啦!
軟雪糕店 -Kimno Espresso  Coffee
我今次試左個筒係好似幸運曲奇,好特別。
食落都幾夾,雪糕又唔會太甜,但幾香。
推薦度:

其實由布院市集仲有好多值得去幫襯既小店,
如果時間許可真係想再掃多轉街。
可惜我地要趕住入夜前(六點前)返到去旅館準備食晚飯,
所以唯有等下次係啦。
分享到:

Leave a Comment

Your email address will not be published. Required fields are marked *

會員登入